Дар Фурудгоҳи байнулмилалии Душанбе бахшида ба ҷашни Рӯзи «Ваҳдати миллӣ» ҷамъомади тантанавӣ баргузор гардид.

Тавре котиби матбуоти ФБД Муҳаммадюсуф Шодиев хабар дод, дар ҷамъомад кормандони фурудгоҳ, собиқадорони меҳнат, намояндагони Кумитаи иҷроияи ҲХДТ аз ноҳияи Шоҳмансури пойтахт иштирок карданд.

«Дар чорабинӣ оид ба мавзӯъҳои «Таърихи истиқрори сулҳ», «Ваҳдати миллӣ ва ҷомеаи шаҳрвандӣ», «Таҷрибаи ҷаҳонӣ кашф кардани сулҳи тоҷикон» ва «Имрӯзи кишвар» маърӯзаҳо карда шуданд», - иброз дошт ӯ.

Ба қавли М.Шодиев, дар боби «Хотираҳо» собиқадорони соҳаи авиатсия оид ба рӯзҳои мудҳиши ҷанги шаҳрвандӣ ва оқибатҳои он, раванди ба сулҳи комил расидан ёдовар шуданд.

Зимнан зикр гардид, ки дар охири ҷамъомад якчанд нафар кормандони Фурудгоҳи Душанбе ботантана ба аъзогии ҲХДТ қабул карда шуданд.