Дар мактабҳои таҳсилоти ҳамагонии мамлакат 4,5 ҳазор омӯзгор бо маълумоти миёна дарс мегӯянд. Дар ин хусус 8-уми июл зимни нишасти матбуотӣ вазири маорифи кишвар Нуриддин Саидов хабар дод.

Ба гуфтаи ӯ, асосан муаллимони дорои маълумоти миёна дар ноҳияҳои дурдасти мамлакат ба таълим машғуланд. Саидов илова кард, ки теъдоди чунин омӯзгорон бо мурури вақт коҳиш хоҳад ёфт, зеро барои ба донишгоҳҳои олӣ дохил шудани чунин муаллимон ба хотири дарёфти маълумоти олӣ тадбирҳо андешида шудааст ва пас аз гирифтани диплом онҳо метавонанд кори омӯзгории худро идома диҳанд. 

Саидов таъкид кард, дар Исфара, Мастчоҳи Кӯҳӣ, Айнӣ, Балҷувон, Нуробод, Рашт ва дигар ноҳияҳои мамлакат, ки норасоии муаллимони соҳибтахассус ба мушоҳида мерасад, аллакай рӯйхати омӯзгорони дорои маълумоти миёна тартиб дода шудааст ва онҳо дар оянда метавонанд бо дастгирии Вазорати маориф ба Донишгоҳи омӯзгорӣ дохил шаванд.

«Илова бар ин, барои такмили ихтисоси муаллимони маълумоти олидор чунин чораҳо андешида шуд: дар давоми 6 моҳи соли равон дар ҷумҳурӣ 485 курси такмили ихтисос бо фарогирии 11,3 ҳазор шунаванда ташкил карда шуд. Дар маҷмӯъ, дар муқоиса бо соли гузашта аз ҷониби Вазорат 135 курс зиёдтар ба роҳ монда шудааст»,- зикр кард Нуриддин Саидов.

Бино ба иттилои Вазорати маориф, то имрӯз теъдоди умумии муаллимон дар қаламрави ҷумҳурӣ 130 ҳазор нафарро ташкил медиҳад. Дар мактабҳо 1 ҳазору 200 омӯзгор намерасад.