Яке аз беморони мубтало ба амрози сӯхтанӣ (сибирская язва)-и беморхонаи сироятии шаҳри Хуҷанд фавтид.

Чӣ тавре ки ба ОИ «Азия-Плюс» яке аз табибони дармонгоҳ, ки нахост номаш ифшо гардад, хабар дод, сокини 57-солаи ноҳияи Айнӣ ҳанӯз рӯзи 8-уми июл фавтида будааст.

«Эҳтимол меравад, ки мард ҳангоми забҳи гов сироят ёфтааст. Бо ошкор шудани аломатҳои нахустини беморӣ санаи 5-уми июл ӯро дар беморхонаи ноҳиявӣ бистарӣ карда, ба назди мо рӯзи 7-уми июл пас аз ташхиси беморӣ оварда шуд. Мутаассифона, аллакай дер шуда, табибон ҳеҷ кӯмаке расонида натавонистанд», - гуфт манбаъ.

Тибқи маълумоти тасҳеҳшуда, дар вилоят айни замон панҷ нафар мубталоёни бемории сӯхтанӣ бистарианд, ки се нафарашон сокинони ноҳияи Айнӣ ва ду нафар сокинони ноҳияи Панҷакент мебошанд.

Бино ба иттилои кормандони тиббӣ, мутахассисони хадамоти санитариву эпидемиологии вилоят дар ноҳияҳои сарчашмаи сироят чораҳои коркарди зарурӣ доир намудаанд. Дар бемористони Хуҷанд барои ин беморон тамоми шароити карантин муҳайё буда, онҳо аз ҳамдигар ва дигар беморон ҷудо табобат мегиранд.

Қаблан иттилоъ дода будем, ки дар ноҳияҳои Панҷакент ва Айнии вилояти Суғд дар 6 нафар аломатҳои гирифторӣ ба бемории сӯхтанӣ (сибирская язва) ошкор шудаанд.