Дар вилояти Суғд минтақаи бемории сӯхтанӣ (сибирская язва) густариш меёбад. Рӯзи сешанбе, 16-уми июл дар ноҳияи Бобоҷон Ғафуров ду ҳолати нави гирифторӣ ба бемории сӯхтанӣ ба қайд гирифта шуд. Дар ин бора ба ОИ «Азия-Плюс» муовини сардухтури маркази санитариву эпидемиологии вилоят Насибҷон Икромов хабар дод.

«Мутобиқи нақшаи амали тасдиқшуда, ба хотири пешгирӣ аз паҳншавии бемориҳои гуногуни сироятӣ аз ҷониби маркази назорати санитарӣ-эпидемилогӣ ҳамарӯза чораву тадбирҳои тиббиву беҳдоштӣ ва байторӣ рӯйи даст гирифта мешаванд, вале сарфи назар аз ин, ҳодисаҳои мубтало гардидан ба бемории сӯхтанӣ дар ноҳияҳои Панҷакенту Айнӣ ва Бобоҷон Ғафуров ошкор шуданд. Ҳамин тариқ, шурӯъ аз моҳи июл дар ноҳияи Айнӣ 4 ҳолат ва дар ноҳияҳои Панҷакенту Бобоҷон Ғафуров дар ҳар кадоме 2 ҳодисаи бемории сӯхтанӣ ба қайд гирифта шуданд», - зикр кард Икромов.

Ба қавли ӯ, дар ноҳияи Айнӣ 33 нафар, Панҷакент – 28 нафар ва ноҳияи Бобоҷон Ғафуров – 6 афроди бо сарчашмаи сироят алоқадошта (ҳайвоноти сироятёфта) ошкор гардида, ин ашхос сабт ва таҳти муоинаи табибони маҳаллӣ қарор доранд.

Тибқи маълумоти расмӣ, айни замон дар се ноҳияи вилояти Суғд ҳашт ҳодисаи гирифторӣ ба бемории сӯхтанӣ ба қайд гирифта шудааст, ки яке аз ин беморон рӯзи 8-уми июл дар бемористони сироятии шаҳри Хуҷанд фавтид.