Собиқ муовини раиси Кумитаи давлатии амнияти миллии Тоҷикистон Оразшоҳ Пояндашоев пешниҳод мекунад, ки санаи 24-уми июл, солгарди оғози рӯйдодҳои Хоруғ «Сешанбеи сиёҳ» эълон карда шавад.

Дар саҳифаи худ дар Facebook Пояндашоев менависад, ки «ба хотири ёдбуди тамоми шаҳидону қурбониёни ин амалиёти васеи низомӣ ва тамоми ҳодисоти нанговари Тоҷикистон (солҳои 1992-2013), хотима додан ба ҷанги бародаркушӣ, ба мудохилаи душманонаи мамолики хориҷӣ ва таъмини адолат, амният ва ваҳдати воқеии тоҷикистониён, аз тамоми мардуми шарифи Тоҷикистон эҳтиромона хоҳиш мекунам, ки ҳар сол, 24 июл дар ҷумҳурӣ рӯзи «Сешанбеи сиёҳ» қайд карда шавад».

Бино ба пешниҳоди ӯ, дар «Сешанбеи сиёҳ» мардум бояд ҳамаи шаҳидону қурбониёни солҳои нангинро ёд кунанду дар синаҳои чапашон лентаҳои сиёҳ бубанданд ва дар миқёси ҷумҳурӣ ба хотири ёдбуди шаҳидону қурбониёни солҳои 1992-2013 дақиқаи сукут элон карда шавад.

Дар ҳамин ҳол, корбарони дигари ин шабакаи иҷтимоӣ, асосан зодагони Бадахшон, пешниҳоди рӯзи солгарди рӯйдодҳои Хоруғ соати 22:00 эълони кардан дақиқаи сукутро дастгирӣ кардаанд. Қобили зикр аст, ки аллакай беш аз 400 нафар аз ташаббуси эълони дақиқаи сукут пуштибонӣ намудаанд.