Рӯзи 22-юми сентябр дар шаҳри Сочии Федератсияи Русия таҳти унвони «Ҳадяи табиати Тоҷикистон» намоишгоҳ доир гардид.

Тавре намояндаи расмии сафорати Тоҷикистон дар Русия Муҳаммад Эгамзод хабар дод, беш аз ҳазорон нафар сокинони шаҳр баҳри шиносоӣ бо фарҳангу расму оин ва харидани маҳсулоти аз ҷиҳати экологӣ тозаи сабзавоту мева аз Тоҷикистон ба майдони назди бандари баҳрии шаҳр гирдиҳам омаданд.

Ба кори намоишгоҳ муовини нахуствазири Тоҷикистон Муродалӣ Алимардон, раиси Иттифоқи «Тоҷикматлубот» Сироҷиддин Валиев ва ҳамчунин намояндаи маъмурияти шаҳри Сочи ҳусни оғоз бахшиданд.

Дар маросими ифтитоҳ зикр гардид, ки кишоварзони тоҷик 540 тонна сабзавоту мева ва маҳсулоти корхонаҳои коркарди ҷумҳуриро ба маърази тамошову харид гузошта, нархҳои маҳсулот нисбат ба бозор арзонтар аст.

М.Эгамзод қайд кард, ки сокинону меҳмонони шаҳри Сочи ба намоишгоҳ таваччӯҳи зиёд зоҳир намуда, назди ҳозирин дастаҳои мусиқиву рақсии «Дарё», «Ориё», «Гулрез», «Ҷаҳоноро» ва дигар устолони санъати тоҷик ҳунарнамоӣ карданд.