Бо қарори раиси шаҳри Душанбе Маҳмадсаид Убайдуллоев дар заминаи қисми бинои моликияти коммуналии  Корхонаи истеҳсолию тиҷоратии воҳиди давлатии «Душанбеагросервис» КВД «Чеварон» таъсис дода мешавад.

Бино ба иттилои хадамоти матбуоти мақомоти шаҳрдории пойтахт, фаъолияти корхона бо мақсади дар сатҳи зарурӣ ба роҳ мондани истеҳсоли либоси мактабӣ ва дигар маҳсулоти дӯзандагӣ, таъмини рақобатпазирии бозори дохилӣ бо маҳсулоти дӯзандагии истеҳсоли ватанӣ, паст намудани арзиши аслии ин намуди маҳсулот дар шаҳри Душанбе ва ба ин васила таъсиси ҷойҳои нави корӣ роҳандозӣ мегардад.

М.Убайдуллоев ба хадамоти дахлдори пойтахт супориш дод, ки дар муҳлати як моҳ ҳуҷҷатҳои таъсисии корхонаро бо сохторҳои марбута таҳия ва мувофиқи тартиби муқарраргардида Оиннома, нақшаи тиҷоратӣ, шумора ва фонди музди меҳнати кормандонро барои тасдиқ ба  Раиси шаҳри  Душанбе  пешниҳод  намоянд.

Гуфта мешавад, ояндаи наздик мақомоти шаҳрдории пойтахт дар бораи ишғоли вазифаи директори Корхонаи воҳиди давлатии «Чеварон»-и Мақомоти иҷроияи маҳаллии ҳокимияти давлатӣ дар шаҳри Душанбе озмун эълон мекунад.