Имрӯз хабарнигори ОИ «Азия-Плюс» Баҳром Маннонов, ки 16-уми январи соли 2009 дар синни 62-солагӣ ногаҳон аз олам даргузаштанд, бояд ба синни 66-солагӣ мерасиданд.

Тамоми шахсоне, ки замоне бо Баҳром Маннонов сарукор доштанд, имрӯз бо некӣ аз ӯ ёд мекунанд.

Вакили палатаи поёнии парлумон кишвар, муовини аввали раиси Ҳизби коммунисти Тоҷикистон Исмоил Талбаков мегӯяд, Баҳром Маннонов яке аз аввалинҳо буд, ки ба инъикоси фаъолияти парлумон дар ВАО ҳусни оғоз бахшид.

«Маводи таҳиянамудаи Б.Манноновро вакилони мардумӣ хуш қабул доштанд, зеро онҳо бо ҳақиқатбаёниву воқеънигорӣ ба ҳама маъқул буданд, - гуфт ӯ. – Чизи дигаре, ки аз Баҳром Маннонов ҳамчун  инсон ва журналист дар хотири ман абадӣ нақш бастааст, дарки моҳияти қонунҳо ва хоксории ӯст».

Номбурда ҳамчунин гуфт, хусусияти муҳими фаъолияти рӯзноманигории Б.Маннонов дар он ифода мегардид, ки дар маводи ӯ ғаразҷӯӣ, дағалӣ ё носаҳеҳӣ ба мушоҳида намерасид.

Сухангӯи раиси пойтахт Шавкат Саидов изҳор кард, ки маводи таҳиянамудаи Баҳром Маннонов барои аксари хадамоти матбуоти вазорату идораҳо як дастури корие буд, ки аз он тарзи инъикоси ин ё он рӯйдодҳо омӯхта мешуданд.

Ҳамқаламони Б.Маннонов зикр мекунанд, ки ӯ тамоми дарди инсонӣ ва мушкилотро хеле наздик ба дил қабул мекард ва барои ҳама мудом мӯнису ғамхор ва мушкилкушову дардошно буд.

Ёди устоди ҳамеша серкор ҳеҷ гоҳ аз хотираҳо зудуда нахоҳад шуд!