Дар деҳаи Юровка, ноҳияи Киево-Святошини вилояти Киеви Украина боқимондаҳои ҷасади сарбози тоҷики дар Ҷанги Бузурги Ватанӣ бедаракшуда Раҳмат Ҳимматов (соли таваллуд 1911), ки зимни муҳориба барои муҳофизати шаҳри Киев моҳи августи соли 1941 ба ҳалокат расидаасту то ҳанӯз бедаракшуда маҳсуб меёфт, дарёфт гардид.

Тавре ба ОИ «Азия-Плюс» муовини командири Иттиҳодияи бостоншиносии ҷустуҷӯиву ватандӯстии «Днер-Украина» Дмитрий Заборин хабар дод, боқимондаҳои ҷасади сарбоз зимни анҷом додани корҳои саҳроӣ моҳи сентябри соли ҷорӣ дарёфт шудаанд.

«Тибқи нишон (жетон)-и шахсии дарёфтшуда, Р.Ҳимматов зодаи Қубодиён, шӯрои деҳоти Самсолиқ, ноҳияи Комосомлобод (феълан Нуробод)-и ҶШС Тоҷикистон аст. Ӯ аз ҷониби комиссариати ҳарбии ноҳияи Комсомолобод ба хизмати ҳарбӣ даъват шудааст. Ному насаби ҳамсараш Тоҳирова Эброви зикр шудааст», - гуфт Заборин ва аз ОИ «Азия-Плюс» дархост намуд, ки ба пайдо кардани хешону наздикони сарбоз Химматов ба ӯ кумак расонида шавад.

Қобили зикр аст, ки дар ҷабҳаҳои набарди ҷанги Бузурги Ватанӣ ҳудуди 290 ҳазор сарбозону афсарони тоҷик корнамоиҳо нишон дода, 90 ҳазор нафари онҳо ба ҳалокат расиданд. Дар ҶБВ 49 нафар тоҷикистониён ба унвони Қаҳрамони Иттиҳоди Шӯравӣ, 14 нафар бо маҷмӯи пурраи се дараҷаи ордени Шараф ва зиёда аз 55 ҳазор нафарашон бо мукофотҳои гуногуни ҷангӣ сарфароз гардонида шуданд.

Моҳи апрели соли гузашта, бо гузашти қариб 70 сол дар назди шаҳри Санкт-Петербург қабри сарбози тоҷики замони ҶБВ бедаракшуда Зайниддин Осимӣ дарёфт гардида буд.