Раиси шаҳри Душанбе Маҳмадсаид Убайдуллоев бо мақсади дар сатҳи баланди ташкиливу ғоявӣ  таҷлил намудани Рӯзи Парчами давлатии Тоҷикистон санаи 24-уми ноябр ва баргузории як силсила чорабиниҳо ба ин муносибат дар пойтахт қарори дахлдор ба имзо расонид.

Бино ба иттилои хадамоти матбуоти мақомоти шаҳрдорӣ, ба ин муносибат рӯзи 24-уми ноябр дар дар боғи фарҳангу фароғатии «Дӯстии халқҳо» аксияи «Садоқат ба Парчам», дар Кӯли ҷавонон аксияи «Орази Парчам», дар майдони Парчами давлатии Ҷумҳурии Тоҷикистон аксияи «Таърихи Парчам» ва дар майдони «800-солагии Москва» аксияи «Муҳаббат ба Парчам» ва ҳамчунин сайругашти идонаи сокинон ва меҳмонон, консертҳо ва дигар чорабиниҳои ҷашнӣ доир мегарданд.

Ба иттилои манбаъ, ҳамчунин чопи мақолаҳо ва таҳияву пахши барномаҳо оид ба рамзҳои давлатӣ, аз ҷумла, таърих ва муҳтавои аломатҳои Парчами  давлатӣ, баргузории дарсҳои мавзӯӣ, вохӯриву сӯҳбатҳо дар мактабҳои таҳсилоти умумӣ, ташкили намоишгоҳи китобҳо ва мизи мудаввар ба ин муносибат дар назар аст.

Гуфта мешавад, ба ифтихори таҷлили ҷашни Рӯзи Парчами давлатии Тоҷикистон дар Муассисаи давлатии «Наврӯзгоҳи пойтахт» веломарафон баргузор мешавад.