Кормандони пулиси шаҳри Маскав зани бо тифли муҳоҷири кории тоҷик ғайбзадаро ҷустуҷӯ доранд.

Бино ба иттилои хабаргузории РИА «Новости» бо истинод ба мақомоти ҳифзи ҳуқуқи Русия, падари тифл дар шабакаи иҷтимоии Интернет бо зан шинос шуда, ин зан ваъда додааст, ки барои ӯ доя пайдо мекунад. Тифлро ба ӯ бовар карда, сипас зан ғайб мезанад.

Муҳоҷири кории тоҷик дар майдони сохтмон бо ӯ вохӯрда, барои дарёфти доя ҳуҷҷатҳои худ ва писари дусолаашро ба ӯ месупорад. Зан кӯдакро бо худ гирифта мебарад ва дигар макони будубоши ӯ маълум нест.

Дар ҳамин ҳол, бино ба иттилои намояндаи расмии сафорати Тоҷикистон дар Русия Муҳаммад Эгамзод, Сафорати Тоҷикистон аз хабари расонаҳои ахбори умуми Русия огоҳ шудааст, ки тифли тоҷикро, ки падараш шаҳрванди Тоҷикистон будааст, дояи (няня) тавассути шабакаҳои иҷтимоии интернет дарёфтаи падараш гирифта ғайб задааст.         

«Мутаасифона, то ҳанӯз ба Сафорат дар бораи ин қазия маълумоти расмӣ аз мақомоти пулиси Москва дохил нашудааст ва худи шаҳрванди Тоҷикистон, ки дар бораи ӯву тифли гумкардааш хабарҳо мухталифанд, низ ба Сафорат муроҷиат накардааст», - гуфт ӯ.         

Ба гуфтаи Эгамзод, сафорат ба мақомоти пулиси Москва дар тамос аст ва ҷузъиёти ин ҳодисаро пайгирӣ дорад. «Ҳамчунин, мо ба фаъолони диаспораи тоҷикони Москва муроҷиат намуда, хоҳиш дорем, ки дар ҳалли ин қазияи ташвишовар кумак расонанд, то ба мо ҳувияти ин шаҳрванди Точикистон ва тифли ӯ маълум гардад», - иброз дошт Эгамзод.

Намояндаи расмии сафорат изҳори умедворӣ кард, ки айни замон мақомоти пулиси Москва пайи ҷустуҷӯйи зани ношинос ва тифли тоҷики рабудаи ӯ буда, дар наздиктарин вақт пайи ӯро хоҳанд ёфт. «Аммо барои мо тааҷҷубовар аст, ки чӣ гуна ва дар кадом вазъият ин ҳодиса ба вуқӯъ пайвастааст. Гузашта аз ин, ҳанӯз воқеъияти ин хабар расман тасдиқ нагардидааст», - афзуд номбурда.