Соли равон дар маҳаллаҳои аҳолинишини минтақаи Кӯлоби вилояти Хатлон боз 10 масҷиди нав ба фаъолият шурӯъ намуда, акнун шумори умумии онҳо дар минтақа то 569 адад расид.

Тавре ба ОИ «Азия-Плюс» мудири шуъбаи умури дин, риояи анъана ва расму оинҳои минтақаи Кӯлоби вилоятиХатлон Шариф Абдулҳамидов дар ин робита хабар дод, 7-то аз ин масоҷид ҷомеъ (марказӣ) буда, 51 ададаш масҷиди намози панҷгона (намози ҷумъа иҷозат дода шудааст) мебошанд.

Ба гуфтаи ӯ, ҳарчанд хоҳишмандони сохтмони манзил дар минтақа зиёд бошанд ҳам, вале камбуди кадрҳои соҳитаҷрибаи умури дин яке аз мушкилоти ҳалношуда боқӣ мемонад. «Чанде қабл 8 нафар имомхатибон дар комиссияи аттестатисонии Шӯрои уламо сатҳи тахассуси касбии худро ҳифз карда натавонистанд», - гуфт ӯ ва илова намуд, ки пас аз ҳар яке аз чунин санҷишҳо аз кор озод шудани замрае аз имомхатибон сурат мегирад.

Сабаби чунин вазъро Абдулҳамидов ба сатҳи пасти тахассусии онҳо нисбат дода, ҳамчунин изҳор намуд, ки ба таври бояду шояд дар мадрасҳо роҳандозӣ нашудани таълими ходимони ояндаи дин низ аз ҷумлаи ин сабабҳост. «Бинобар сабаби номутобиқатии асноди фаннӣ ба қонунгузории ҷумҳурӣ ва номувофиқатии барномаи таълим, муддати беш аз ним сол аст, ки фаъолияти мадраса дар ноҳияи Ховалинг қатъ гардида, 178 нафар толибилмони он ба хонаҳояшон рухсатӣ шудаанд», - иброз дошт номбурда.

Қобили зикр аст, ки соли 2013 бо сабабҳои ба ин монанд фаъолияти боз ду мадраса дар вилояти Хатлон - мадрасаи занона ва мардона дар шаҳри Қӯрғонтеппа низ мутаваққиф гардидааст.