Чанде қабл ҳудуди 70 нафар соҳибкорони ноҳияи Мӯъминобод бо раиси ноҳияи мазкур мулоқот карданд.

Тавре ба ОИ «Азия-Плюс» раиси ноҳия Пирмад Зарифов хабар дод, ҳамаи соҳибкорон зодаи ҳамин ноҳия буда, дар вохӯрии аввал оид ба таъсиси Шӯрои сиёсати сармоягузорӣ дар назди раиси ноҳия тасмим гирифта шудааст. «Баъди 10 рӯз вохӯрии навбатӣ доир гардида, дар он соҳибкорон ташаббусу нақшаҳои худ дар ин самтро мушаххасан пешниҳод хоҳанд кард», - иброз дошт ӯ.

Ба қавли раиси ноҳия, дар мулоқоти аввал мувофиқа ҳосил шудааст, ки воситаҳои баҳри рушди ноҳия сармоягузоришуда дар ихтиёри худи соҳикборон қарор хоҳанд дошт. «Дар вохӯрии навбатӣ пешниҳоди лоиҳаҳои сохтмони корхонаҳои хурди коркарди маҳсулот, толори варзишӣ, литсей, корхонаи асфалтбарорӣ ва дигар иншооти таъиноти иқтисодиву иҷтимоӣ дар назар буда, соҳибкорон ҳамчунин ба иқдомоти хайрия низ таваҷҷуҳ зоҳир хоҳанд кард», - афзуд П.Зарифов.