Иҷрокунандаи раиси вилояти Хатлон Давлатшо Гулмаҳмадов аз рафти иҷрои барномаи давлатии «Рушди соҳаи тандурустии вилояти Хатлон барои солҳои 2013-2015» изҳори нигаронӣ намуд.

Бино ба гуфти як манбаъ аз мақомоти иҷроияи ҳокимияти давлатии вилоят, Давлатшо Гулмаҳмадов дар яке аз ҷаласаҳои ҳукумати вилоят аз он изҳори ташвиш намудааст, ки рафти иҷрои барномаи номбурда дар қаламрави вилоят ғайриқаноатбахш аст.

«Дар ин барнома, ки дар маҷмӯъ 313,8 млн. сомониро дар бар мегирад, барои соли 2013 128,8 млн. сомонӣ пешбинӣ шуда буд. Мутаассифона, иҷрои ин барнома дар соли 2013 ҳамагӣ 46,6 млн.н сомонӣ ё худ ё 36,2% аз ҳаҷми умумиро ташкил додааст», - гуфтааст раиси вилоят.

Барои шарҳи ин гуфтаҳои раиси вилоят мо ба раёсати тандурустии вилояти Хатлон муроҷиат намудем. Як манбаъ аз ин раёсат, ки нахост номашро ифшо кунем, гуфт, ин соли аввал аст ва баъзе мушкилӣ баҳри иҷрои барнома пеш омада, баъдан баъзе аз навоҳии вилоят дар иҷрои ин барнома хунукназарӣ зоҳир намудаанд. 

«Аслан аз маблағи умумии барнома, ки ба 313,7 млн. сомонӣ баробар аст, 176 млн. сомонии он бояд бо ҷалби маблағҳои сармоягузорони дохиливу хориҷӣ амалӣ карда шавад, вале мутаассифона, соли гузашта ба қисме аз навоҳӣ барои иҷрои ин барнома ҷалби на сармоягузорони дохиливу на хориҷӣ муясссар нагардид. Умедворем, ки соли 2014 рафти амалисозии барномаи номбурда хуб ба роҳ монда мешавад,  - афзуд манбаъ.