То ҷашни Наврӯз ҳудудан 40 оилаи зарардида аз заминларзаи Ваҳдат бо хонаҳои истиқоматӣ пурра таъмин карда мешаванд. Дар ин бора 9-уми январ  Абдувалӣ Комилов - раиси Кумитаи меъморӣ ва сохтмони назди Ҳукумати Ҷумҳурии Тоҷикистон зимни гузаронидани ҷамъбасти фаъолияти солона хабар дод.

Ба гуфтаи ӯ, аз 105 хонаи банақшагирифташуда дар маҳаллаи навбунёди Истиқлоли ҷамоати деҳоти Раҷаб Исмоили шаҳри Ваҳдат айни замон дар 61 қитъаи замини ҷудошуда корҳои сохтмонӣ идома доранд,

Ёдрас мешавем, ки дар натиҷаи заминларзаи моҳи ноябри соли гузашта дар ҷамоатҳои Карим Исмоил, Раҷаб Исмоил, Бозорбой Боронов ва Чорсӯйи ноҳияи Ваҳдат 104 хонаи истиқоматӣ пурра ва 259 хона қисман хароб гардиданд.Тибқи маълумоти Кумитаи ҳолатҳои фавқуллода талафоти ҷонӣ ба қайд гирифта нашудааст.

Бо супориши президенти кишвар Эмомалӣ Раҳмон вазорату идораҳо вазифадор шуданд, ки таъҷилан ба осебдидагони заминларза кӯмак расонанд ва барои барқарор кардани хонаҳои истиқоматӣ тадбирҳои амалӣ андешанд.