Нимаи дуюми имрӯз ба нишастҳои хабарии ҷамъбасти сол дар вилояти Хатлон раиси вилоят Давлатшо Гулмаҳмадов ҳусни оғоз мебахшад.

Чуноне ки аз маркази матбуотии раиси вилояти Хатлон хабар доданд имрӯз соати 15:00 дар бинои ҳукумати вилояти Хатлон нишасти матбуотии раиси вилояти Хатлон Давлатшо Гулмаҳмадов доир мегардад.

Ба гуфти манбаъ, ба ин нишаст намояндагони васоити ахбори умуми маҳаллӣ, ҷумҳуриявӣ ва байналминалӣ даъват шудаанд. «Ҳамчунин дар нишаст хабарии раиси вилоят роҳбарони ташкилоту идораҳои вилоят низ ширкат хоҳанд варзид», - гуфт манбаъ.

Зимнан зикр гардид, ки имрӯз соати 9:00 дар бинои мақомоти иҷроияи ҳокимияти давлатии вилояти Хатлон ҷаласаи ҷамъбасти солонаи хоҷагии халқи вилоят оғоз гардида, дар он натиҷаҳои фаъолияти хоҷагии халқи вилоят дар соли гузашта ва нақшаҳо барои соли 2014 мавриди баррасӣ қарор мегиранд. «Дар ин ҷаласа роҳбарони шаҳру навоҳии вилоят ва сардорони ташкилоту идораҳо иштирок доранд», - афзуд манбаъ.