Иттиҳоди тоҷикони Қирғизистон ба номи Рӯдакӣ бо интишори як нома ба мардум ва ҳукуматҳои Тоҷикистону Қирғизистон муроҷиат кард. Дар ин бора «Вечерний Бишкек» иттилоъ медиҳад.

Бино ба иттилои хабаргузории «Озодагон» , дар нома зикр гардидааст, ки садсолаҳо ба ин тараф мардуми Қирғизистон ва Тоҷикистон дар ҳамсоягии якдигар ва дар фазои дӯстӣ, бародарӣ ва якдигарфаҳмӣ зиндагӣ дошта, дар аҳди Шӯравӣ ва замони соҳибистиқлолӣ қирғизҳо ва тоҷикон анъанаи гузаштагони худро ҳифз карда, дар тамоми масъалаҳо ба созиш мерасиданд, ки гувоҳи он таҷлили хотирмони ҷашни 20-солагии роҳандозии муносибатҳои дипломатӣ миёни кишварҳо мебошад.

«Мо, тоҷикони дар замини пурфайзи Қирғизистон зиндагӣ дошта, ҳамеша бо некбинӣ ба оянда нигоҳ кардаву нигоҳ мекунем. Иттиҳодияи мо аъзои Ассамблеяи мардуми Қирғизистон аст ва ҳамеша аз ҷониби он пуштибониро эҳсос мекунад. Ҳукумати Қирғизистон барои ҳифз ва рушди забони модарӣ, фарҳанг ва анъанаҳои гузаштаҳо шароити мусоидро фароҳам овардааст. Бародарони қирғизи мо ҳам дар замини Рӯдакии бузург дар ҳоли амн ба сар мебаранд. Аз ин рӯ, мо тоҷикони Қирғизистон низои дар марзи муштараки ду кишвар ба вуқӯъомадаро бо дард қабул кардем. Мо медонем, ки бархе проблемаҳоро аз Шӯравӣ мерос гирифтаем ва баҳси замин ба осонӣ ҳал намешавад. Аммо умед дорем, танҳо бо роҳи музокирот ва ҳамдигарфаҳмиву эҳтироми тарафайн мешавад аз вазъият берун шуд», - омадааст дар муроҷиатнома.

Иттиҳоди тоҷикони Қирғизистон  мардуми ду кишварро ба таҳамулпазирӣ даъват намуда, изҳори итминон кардааст, ки ҳукуматҳои ду кишвар барои ҳалли ҳарчи зудтари вазъи баамаломада бидуни талоши тарафи сеюм чораҳои зарурӣ меандешанд.