Ба нашри шумораи нахусти ҳафтавори ҷамъиятиву сиёсии  «Азия-Плюс» имрӯз 14 сол пур шуд.

Нашрияи «Азия-Плюс» дар саросари ҷумҳурӣ паҳн гардида, аз рӯи таъсиру нуфуз дар ҷомеа миёни дигар нашрияҳои ҷамъиятиву сиёсии кишвар бо забони русӣ устуворона мақоми пешсафиро ишғол мекунад. Қисмати зиёди маводи нашрия мушкилоти сиёсиву иҷтимоӣ ва иқтисодиро дар бар мегиранд.

Тӯли солҳои мавҷудият ҳафтавор аз нашрияи хурди 16-саҳифагӣ ба газетаи қобили мулоҳиза дар ҳаҷми 48-56 саҳифа ва теъдоди бештарини нашр дар кишвар табдил ёфт.

Аз оғози фаъолият ҳайати кормандони ҳафтавор ба сифати маводи нашршуда таваҷҷуҳи ҷиддӣ зоҳир мекарданд. Маводҳои ҳафтавор вокунишҳои зиёде дар ҷомеаро ба бор оварда, сарчашмаи маълумоти васоити ахбори умумии ватаниву хориҷӣ мебошанд.

Роҳбарони сохторҳои давлатӣ, намояндагиҳои дипломатӣ, ташкилотҳои ғайридавлатии байнулмилалӣ ва ватанӣ, ниҳодҳои молиявӣ, соҳибкорону зиёиён ва мардуми оддии ҷумҳурӣ аз ҷумлаи хонандагони доимии нашрия ба шумор мераванд.