Бо мақсади таъмини тартиботу интизоми зарурӣ, дар тамоми аудиторияҳои Донишгоҳи давлатии тиҷоратии Хуҷанд (ДДТХ) аз ҳисоби худи донишгоҳ видеокамераҳо гузошта шуданд.

Зимни нишасти хабарии ҷамъбасти натиҷаҳои фаъолият дар соли гузашта ректори донишгоҳ Иномҷон Аминов изҳор намуд, ки соли 2013 донишгоҳ ба маблаги умумии беш аз 2,5 млн. сомонӣ андоз пардохт намудааст. «Айни замон дар донишгоҳ 4400 донишҷӯ таҳсил дошта, ба ҷуз гуруҳҳои таҳсил бо забони русиву тоҷикӣ, 9 гурӯҳи таҳсил бо забони англисӣ низ амал мекунад», - иброз дошт ӯ.

Ба гуфтаи ӯ, дар донишгоҳ соли гузашта журнали электронӣ ҷорӣ гардид, ки он маълумот дар бораи донишҷӯён ва давомоти онҳо ва ҳамчунин натиҷаҳои имтиҳону санҷишҳоро дар бар мегирад. «Китобхонаи электронии донишгоҳ бо беш аз 50 ҳазор нусха китобҳои электронӣ бо забонҳои гуногун таъмин аст», - афзуд роҳбари донишгоҳ.