Дар мусоҳиба ба хабарнигори ОИ «Азия-Плюс» сардори Раёсати иттиҳодияҳои ҷамъиятии Кумита оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон Солеҳҷон Завқиев изҳор кард, ки тамоми масҷидҳои шаҳри Душанбе комилан бо видеокамераҳои мушоҳидавӣ муҷаҳҳазанд.

Ба гуфтаи ӯ, айни замон дар саросари ҷумҳурӣ 365 масҷидҳои марказии ҷомеъ ва намози ҷумъа амал карда, дар ҳамаи онҳо видеокамераҳои мушоҳидавӣ гузошта шудаанд. «Ҳамчунин тамоми масҷидҳои намози панҷгонаи пойтахт, ки шуморашон 51 ададро ташкил медиҳад, низ бо видеокамераҳои мушоҳидавӣ таъмин карда шуданд», - гуфт ӯ.

Солеҳҷон Завқиев зикр кард, ки минбаъд таъмини тамоми масҷидҳои кишвар бо видеокамераҳои мушоҳидавӣ дар назар аст. «Чун имконоти масҷидҳои намози панҷгона дар деҳоти кишвар нокофист, видеокамераҳоро мо алҳол танҳо дар масҷидҳои намози ҷумъа насб кардем, вале ояндаи наздик масҷидҳои намози панҷгона низ бо ин гуна видеокамераҳо муҷаҳҳаз гардонида мешаванд», - афзуд номбурда.

Дар акс: видеокамера дар даромадгоҳи масҷиди ба номи Ҳоҷӣ Яъқуби шаҳри Душанбе.