Собиқ директори шабакаи телевизиони «Пойтахт» Абдуқодири Абдуқаҳҳор сардори Раёсати фарҳанги мақомоти шаҳрдории Душанбе таъин карда шуд. Собиқ сардори ин Раёсат Шаҳло Мӯсоева директори шабакаи телевезиони «Пойтахт» таъин шуда, Абдуқодири Абдуқаҳҳор, ки чанд рӯз қабл ба истеъфо рафта буд,  ба ин вазифа таъин гардид.

Абдуқодири Абдуқаҳҳор ба ОИ «Азия-Плюс» дар ин робита изҳор намуд, ки мансаби нав низ масъулияти зиёд тақозо дошта, ба ҳар ҳол, ӯ аз андешаи амалӣ сохтани орзуяш – таъсиси шабакаи телевизионӣ тибқи консепсияи дар телевизиони «Пойтахт» доштааш даст намекашад.

«Албатта, ҳозир ман ба фаъолият дар Раёсати фарҳанги пойтахт шурӯъ мекунам. Дар пеш таҷлили ҷашни 90-солагии пойтахт ба нақша гирифта шуда, ман кӯшиш ба харҷ медиҳам, ки фарҳангшиносони беҳтаринро атрофи худ муттаҳид сохта, ҷашнро бо тарзи комилан тоза барпо кунам», - иброз дошт ӯ.

Номбурда бори дигар ба масъалаи таъсиси шабакаи телевизионӣ бо консепсияи нав дахл карда, таъкид дошт, ки ахиран аз ҷониби шахсони алоҳида оид ба амалисозии ин тарҳҳо кумаки молиявӣ пешниҳод шудааст. «Агар шабакаи нав таъсис дода шавад, дар ин ҳолат он ҷамъиятӣ ё хусусӣ хоҳад буд», - афзуд А.Абдуқаҳҳор.

Ёдрас мекунем, ки қаблан дар робита ба масъалаи истеъфояш аз мансаби директори ТВ «Пойтахт» А.Абдуқаҳҳор изҳор намуда буд, ки ӯ мехост мақоми ин шабакаро ба сатҳи байналмиллалӣ бардорад, аммо бо раиси шаҳри Душанбе ихтилофи назар пайдо шуд.