Дар доираи барномаи рушди иқтисодию иҷтимоии ноҳияи Қубодиён барои солҳои 2011-2015 иншоотҳои зиёди иҷтимоию иқтисодӣ сохта мешаванд.

Бино ба гуфти раиси ноҳияи номбурда Саъдулло Бекназаров, барнома дар чанд самт аз ҷумла иҷтимоиёт, фарҳанг ва иқтисодиёт равона шуда, маблағи уммии барнома 126 млн. сомониро ташкил медиҳад.

С.Бекназаров зикр кард, ки аз лоиҳаҳои барнома як қисмаш ба маблағи беш аз 64 млн. сомонӣ,  аз ҷумла дар самти маориф, тандурустӣ, варзиш ва фарҳанг  ба маблағи 12 млн., зербино аз қабили кашидани хатти оби нӯшокӣ ва хатти барқ барои маҳалаҳои навбунёд ва таъмири 70 км роҳҳи мошингард - 44 млн, корҳои соҳилмустаҳкамкунӣ - 1,3 млн. ва сохтмон корхонаҳои саноатӣ ба маблағи 7 млн. сомонӣ сармоягузорӣ  ниёз дорад.

«Роҳбарияти ноҳия баҳри ҷалби соҳибкорону маблағгузорони дохиливу хориҷӣ тамоми кӯшишро ба харҷ дода истодааст, то ки ин барнома то соли 2015 ба пурраги амалӣ шавад» - афзуд раиси ноҳия.