Ба собиқадорони Ҷанги Бузурги Ватанӣ дар шаҳри Кӯлоб намояндагони президенти мамлакат, раиси вилояти Хатлон ва раиси шаҳри Кӯлоб кумакпулӣ супурданд.

Тавре ба «Азия-Плюс» раиси Шӯрои собиқадорони ҷангу меҳнати шаҳри Кӯлоб Асадулло Қурбонов хабар дод, тӯли 4 моҳе, ки рӯйхати 38 нафар собиқадорони ҷанг таҳия гардид, 4 тан аз онҳо вафот карда, ба оилаҳои онҳо ва иштирокчиёне, ки имрӯз ба бинои ҳукумат ҳозир шуда натавонистанд, кумакпулӣ ба манзили зисташон расонида мешавад.

Дар суҳбат бо хабарнигори «Азия-Плюс» раиси Кумитаи кор бо занон ва оилаи назди ҳукумати ҶТ Махфират Хидирова изҳор намуд, ки ӯ имрӯз бо хушнудӣ супориши сарвари давлатро иҷро карда, ба собиқадорон 1000 сомонигӣ кумакпулӣ тақдим кард.

Дар ҳамин ҳол, собиқадорони ҶБВ аз номи раиси вилояти Хатлон, 400 сомонигӣ гирифта, ба 38 нафар иштиркчиёни ҷанг ва 14 нафар собиқадорон раиси шаҳри Кӯлоб Абдуғаффор Раҳмонов шахсан 300 сомонигӣ кумакпулӣ тақдим намуд.