Муассисаи давлатии обуҳавошиносии Тоҷикистон огоҳ мекунад, ки ду рӯзи наздик аз болоравии бесобиқаи ҳарорати ҳаво рӯзона дар Тоҷикистон интизорӣ меравад. Дар ин рӯзҳо ҳарорати ҳаво дар водиҳо метавонад ба зиёда аз 45 дараҷа гармӣ бирасад.

Ба иттилои манбаъ, рӯзҳои 22-24-уми июл ҳарорати ҳаво дар вилояти Хатлон шабона 22-23 рӯзона 45-47, дар вилояти Суғд шабона 21-23 рӯзона 42-43 дараҷа гарм мешавад. «Дар ноҳияҳои тобеи марказ шабона 19-21 рӯзона 40-42, дар ғарби Вилояти Мухтори Кӯҳистони Бадахшон шабона 19-21 рӯзона 35-37 ва дар Душанбе ҳарорат шабона 19-21 ва рӯзона ба 40-42 дараҷа мерасад», - гуфтанд дар муассисаи мазкур.

Зимнан зикр гардид, ки болоравии оби сатҳи дарёҳо, ки аз захираҳои мавсимии барф ва пиряхҳо (дарёҳои Вахш, Панҷ, Гунт, Бартанг, Ванҷ, Язғулом, Зарафшон ва ғайра) сарчашма мегиранд, дар назар аст. «Ҳамчунин фаромадани сел дар минтақаҳои кӯҳистони ҷумҳурӣ низ аз эҳтимол дур нест», - афзуд сарчашмаи хабар.