Мардуми мусалмони Тоҷикистон ба таҷлили иди саиди Фитр, ки рӯзи 28-уми июл фаро мерасад, омодагӣ мегиранд. Субҳи ин рӯз дар тамоми масҷидҳои кишвар намози ид баргузор мешавад.

Қобили зикр аст, ки соли равон барои мусалмонони рӯзадори Тоҷикистон хеле душвор омад, зеро муддати моҳи Рамазон ҳарорати ҳаво то ба 40-45 дараҷа гармӣ мерасид.

Мақомоти шаҳрдории Душанбе дар ҳамдастӣ бо соҳибкорони пойтахт ҷиҳати таъмини аҳолии шаҳр бо маҳсулоти ғизойии нархҳояшон дастрас дар остонаи иди моҳи шарифи Рамазон аз 25 то 27-уми июл ярмарка-фурӯши маҳсулоти ғизойӣ барпо мекунад.

Қобили зикр аст, ки соли равон маблағи закот (андози ҳатмии солона ба фоидаи камбизоатон)-ро мусалмононе месупоранд, ки на камтар аз 2 ҳазору 175 доллари ИМА воситаҳои зиёдатӣ доранд. Ҳаҷми садақаи фитр (хайрия) имсол 4 сомонӣ барои 1 моҳ муқаррар шудааст. Ин маблағ бо назардошти қоидаҳои шариати ислом бо нархи 2 кило орд муайян гардидааст.

Маъмулан, дар ин рӯз субҳи зуд кӯдакон бо табрикоти ид ба хонаҳо омада, идона мегиранд. Рӯзи ид пас аз пардохти закот ба дидори хешу ақрабо ва барои дуову фотеҳа сари мазори гузаштагони худ мераванд. Баҳри пешвози меҳмонон дар хонаводаҳо дастурхони идона ороста мешавад.

Мутобиқи Қонуни ҶТ «Дар бораи рӯзҳои ид», Иди Рамазон дар кишвар рӯзи истироҳат эълон шудааст.