Рӯзи 29-уми август дар шаҳри Душанбе ба истифода додани иншооти нав ба муносибати 23-юмин солгарди ҷашни истиқлоли давлатӣ бо иштироки президенти мамлакат оғоз мегардад.

Тавре ба «Азия-Плюс» як манбаъ аз ҳукумати ҷумҳурӣ иттилоъ дод, дар ин рӯз сарвари давлат ва раиси пойтахт дар маросими мавриди бахрбардорӣ қарор додани бинои нави мактаби таҳсилоти миёнаи умумии №62 дар шаҳри Душанбе барои 640 нафар толибилмон ширкат хоҳанд варзид. Ба ифтихори ин ҷашн дар бинои мактабҳои №37, 52 ва 92-и шаҳри Душанбе низ корҳои таъмиру азнавсозӣ анҷом дода шуданд.

Бино ба маълумоти мақомоти шаҳрдории пойтахт, дар шахри Душанбе ба муносибати ҷашни солгарди истиқлол иншооти таъиноти гуногун ба маблағи умумии 721,4 млн. сомонӣ ба истифода дода мешаванд, ки асосан аз ҳисоби маблағҳои буҷети шаҳр ва субъектҳои соҳибкорӣ сохта шудаанд.

Ҳамин тариқ, дар остонаи ҷашн дар пойтахти кишвар маркази савдои «Пойтахт-90», меҳмонхонаи панҷситорадори «Sheraton», 1 манзили истиқоматии 12-ошёна, 11 манзили истиқоматии 9-ошёна, 8 манзили зисти 5-ошёна ва майдонҳои варзишӣ мавриди истифода қарор мегиранд. Дар иншооти нав беш аз 1,5 ҳазор нафар сокинони шаҳр бо ҷойи кори доимӣ таъмин карда хоҳанд шуд.