Рӯзи 29-уми август дар шаҳри Қӯрғонтеппа намоишгоҳ-ярмаркаи дурӯзаи маҳсулоти истеҳсолкунандагони Тоҷикистону Афғонистон ба кор шурӯъ намуд.

Намояндаи дастгоҳи раиси вилояти Хатлон Барот Бойматов зимни суханронӣ дар маросими ифтитоҳи намоишгоҳ қайд кард, ки дар шаҳри Қӯрғонтеппа чунин намоишгоҳ-ярмарка маротибаи сеюм доир гардида, баргузории чунин чорабиниҳо ба таҳкими ҳамкориҳои миёни соҳибкорони ҳарду кишвар ва фароҳам овардани шароитҳои мусоид барои ҳамкории минбаъда мусоидат менамояд.

Намояндаи маъмурияти музофоти Қундузи Афғонистон Маҳбубулло Маҳбуб дар навбати худ зикр кард, ки вазъи имрӯзаи Афғонистон ба ҷалби бештари соҳибкорони афғонӣ имкон намедиҳад ва изҳори умедворӣ намуд, ки минбаъд чунин чорабиниҳо бо ҷалби зиёдтари соҳибкорон мунтазам баргузор карда шаванд.