Дар шаҳри Красноярски Русия ихтиёриён барои ҷарроҳии тифли навзоди якмоҳа аз Тоҷикистон маблағи пулӣ ҷамъоварӣ мекунанд.

Бино ба маълумоти хабаргузории НГС. Новости , Марям Сафароваи 1-моҳа рӯзи 5-уми сентябр аз бемористони №20-и шаҳр ба шуъбаи эҳёгарии маркази ҷарроҳии дилу раг барои кӯдакон гузаронида шудааст.

«Вазъи солимии кӯдак дар ҳоли бадшавӣ қарор дошта, барои наҷоти ҳаёти тифл анҷоми ҷарроҳии дили ӯ зарур аст, ки арзишаш 1,2 млн. рублро ташкил медиҳад», - менависад хабаргузорӣ.

Гуфта мешавад, волидайни тифл шаҳрвандони Тоҷикистон буда, барои кор ба шаҳри Красноярск омадаанд, аз ин рӯ, аз ҳисоби буҷет гузаронидани ҷарроҳӣ барои кӯдак имкон надорад.

Ихтиёриёнро хабарнигори НГС рӯзи 6-уми сентябр дар гузаргоҳи назди маркази телевизиону радиои «Планета» мушоҳида кардааст. Онҳо бо шиору овезаҳои ҳикояткунандаи таърихи духтарча рост истода, барои ҷалби таваҷҷуҳ аз филмҳои тасвирӣ сурудҳо мехондаанд.

Зикр мегардад, ки ихтиёриён аз роҳгузарон даъват мекардаанд, ки барои ҷамъоварии мбалағ ба онҳо ҳамроҳ шуда, рост биистанд ва чанде даъвати онҳоро пазируфтаанд. Аз рӯи мушоҳидаҳои хабарнигор, роҳгузарон ба қуттии хайрия пулҳои арзишашон 50 ва 100-рублӣ мепартофтаанд.