Мақомоти шаҳрдории Кӯлоб ҷиҳати бо таълими касбӣ фаро гирифтани 3 ҳазор деҳқонони ноҳияи Кӯлоб, аз ҷумла 1,5 ҳазор нафар занон ва донишҳо дар соҳаи аграриро азхуд кардани онҳо, бо созмони байнулмилалии Oxfam шартнома ба имзо расонид.

Мудири шуъбаи иқтисод ва савдои шаҳрдории Кӯлоб А.Хӯҷамқулов ба «Азия-Плюс» дар ин робита иттилоъ дод, ки шартнома ба муҳлати 1 сол бо тамдиди минбаъдаи он то 5 сол баста шудааст.

«Таҳқиқоти гурӯҳи мониторинг нишон дод, ки 90%-и раҳбарони ҳудуди 1700 хоҷагиҳои деҳқонӣ комилан аз донишҳо дар соҳаи аграрӣ бархӯрдор нестанд ва баъзан одамони тамоман тасодуфӣ ба кишоварзӣ машғуланд», - иброз дошт ӯ.

Ба гуфтаи номбурда, ба ҷуз семинару суҳбат ва дигар машғулиятҳои назариявӣ, дар доираи лоиҳа мақомот барои таҷрибаи амалӣ 1 гектар қитъаи замин ҷудо кард, ки дар гармхонаҳо низ ниҳолу кӯчати баъзе зироатҳо парвариш карда мешаванд.

«Дар торнамои махсуси интернетӣ деҳқонони дар лоиҳа фарогирифта тариқи телефони ҳамроҳ метавонанд оид ба ин ё он масъала машварат гирифта, ҳамчунин масъалаи тавассути ташкилотҳои қарзии хурд ба кишоварзон ҷудо кардани қарзҳои имтиёзнок низ мавриди баррасӣ қарор дорад», - афзуд  Хӯҷамқулов.