Бо пешниҳоди ҳукумати ҷумҳурӣ аъзои Маҷлиси миллии Маҷлиси Олии ҶТ даъвати чорум номи як қатор маҳаллаҳои аҳолинишин дар шаҳри Панҷакент, ноҳияҳои Ашт, Шӯрообод, Бохтар ва Қубодиёнро иваз намуданд.

Дар шаҳри Панҷакент деҳаи Хирсхона – Ганҷи Ниҳон, деҳаи Қӯштеппа – Наврӯзтеппа, деҳаи Қиёқлӣ – Ҳафтрӯд ва дар ноҳияи Ашт деҳаи Бобокир – Бобохайр номгузорӣ шуд.

Дар ноҳияи Шӯрообод деҳаи Навбӯлоқ ба Раҳмонобод, дар ноҳияи Қубодиён деҳаи ба номи Фрунзе ба Навбаҳор, деҳаи Шоҳ-2 ба Намуна ва деҳаи Дмитров ба деҳаи ба номи Хайрулло Файзуллоев табдили ном карданд.

Дар ноҳияи Бохтар ба деҳаи Фрунзе номи Обшорон, деҳаи Посёлкаи нав номи Файзобод, деҳаи Бирлик номи Чорбоғ ва деҳаи Будёний номи Сероб гузошта шуд.