Сокини ноҳияи Қубодиёни вилояти Хатлон изҳор намуд, ки рӯзи 18-уми ноябр ҳангоми кӯчонидани хонаи кӯҳнаи худ боқимондаи устухонҳои динозаврро пайдо кардааст.

Ин сокини ноҳияи Қубодиён Ҷӯрабек Шарифов ба «Азия-Плюс» дар ин робита иттилоъ дод, ки боқимондаҳои устухонҳо ба ҷасади динозаври андозааш начандон бузург шабоҳат доранд. «Дарозии устухонҳон ҷасади дарёфтаи мо ҳудуди 60 сантиметрро ташкил дода, худи динозавр шояд як метр дарозӣ доштааст», - гуфт ҳамсуҳбат.

Ба қавли вай, боқимондаҳои ҷасад дар хонаи ӯ қарор дошта, ин боқимондаҳои ҷасади динозавр буданаш хулосаи шахсии ӯст ва алҳол ҳеҷ мақомоти дахлдор ба ин маълумот вокунише нишон надода, боқимондаҳоро ҳам касе ташхис накардааст.

Сардори шуъбаи ҳифзи мероси фарҳангии Вазорати фарҳанги ҷумҳурӣ Музаффар Азизов ба «Азия-Плюс» дар мавриди ин масъала изҳор намуд, ки дар вазорат ҳанӯз аз ин «бозёфт» огаҳии дақиқ надоранд.

«Ба Вазорати фарҳанг алҳол дар ин бора касе хабар надодааст ва ҳоло маълум ҳам нест, ки оё он боқимондаи ҷасади динозавр аст ё чизи дигар. Ба мо дар бораи дарёфти боқимондаҳои ҷасади динозавр маълумоти зиёд мерасад, вале баъди ташхис маълум мегардад, ки онҳо ба оилаи динозаврҳо ҳеҷ муносибате надоранд», - гуфт Азизов.