Дар шаҳри Панҷакенти вилояти Суғд бо ташаббуси Ташкилоти ҷамъиятии «Нури умед» намоиши  ҳунарҳои занони деҳот баргузор гардид.

Бино ба маълуомти хадамоти матбуоти раиси вилояти Суғд, намоиши мазкур дар доираи лоиҳаи «Зан - замин - зиндагӣ», ки бо дастгирии Ассотсиатсияи «Дӯстони «Нури Умед» (Швейтсария)  ба роҳ монда шудааст, сурат гирифт.

Гуфта мешавад, дар намоиш дастдӯзиҳои занон, қуроқдӯзӣ, бофандагӣ, сабадбофӣ, ҷомаю тоқидӯзӣ ва дигар ҳунарҳои занони деҳоти Панҷакент ба маъразт тамошо бароварда шуданд.

Саломат Аёзова, роҳбари ташкилоти  «Нури умед» ҳадафи фаъолияташонро дастгирии занҳо, муайян ва пайдо кардани занони ҳунарманд, баланд бардоштани савияи дониши занон, омӯхтани донишҳои кишоварзӣ унвон намудааст. «Ин намоиш як ҷамъомади ҳисоботии мо дар назди мардум буд», - таъкид кардааст Саломат Аёзова.