Аз шоми дирӯз то субҳи имрӯз Фурудгоҳи байнулмилалии Душанбе (ФБД) бар асари тумани ғализе, ки фазои шаҳри Душанберо фаро гирифт, ҳавопаймоҳоро қабул ва ба нуқтаи таъинот раҳсипор карда натавонист.

Тавре аз ФБД хабар доданд, айни замон туман парокандаву аёният хуб ва дар фурсати наздиктарин ба парвози тамоми ҳавопаймоҳо тариқи хатсайрҳо, ки аз шоми дирӯз мутаваққиф шуда буданд, иҷозат дода мешавад.

Дар ҳамин ҳол, мутобиқи маълумоти лавҳаҳои онлайни хатсайрҳои ҳавопаймоии Тоҷикистон, шоми дирӯз ва субҳи имрӯз дар Фурудгоҳи Хуҷанд низ чунин вазъ ба амал омада, лекин Фурудгоҳи байнулмилалии Кӯлоб бо реҷаи муқаррарӣ фаъолият дорад.

Бино ба маълумоти обуҳавошиносон, шабонарӯзи наздик ҳаво дар ҷумҳурӣ сард мешавад. Рӯзҳои истиороҳат ҳарорати ҳаво аз 4 дараҷа гармӣ болотар намеравад. Рӯзи якшанбе боришот дар назар аст.