Раиси вилояти Суғд Абдураҳмон Қодирӣ раисони навтаъини шаҳру навоҳии вилоятро ба фаъолон муаррифӣ намуд.

Бино ба иттилои хадамоти матбуоти раиси вилояти Суғд, Худойназар Амонзода, аз вазифаи раиси шаҳри Қайроққум озод карда шуда, иҷрокунандаи вазифаи раиси шаҳри Истиқлол ва Матлубахон Сатториён аз вазифаи раиси шаҳри Истиқлол озод карда шуда, иҷрокунандаи вазифаи раиси шаҳри Қайроққум таъин шуданд.

Ҳамчунин дар натиҷаи тағироти кадрӣ Нӯъмон Обидзода аз вазифаи раиси шаҳри Конибодом озод карда шуда, ба ҷои ӯ Ғайбулло Боҳиров иҷрокунандаи вазифаи раиси шаҳри Конибодом таъин карда шуд.

Ба ҷои Сӯҳроб Охунзода, собиқ раиси ноҳияи Кӯҳистони Мастчоҳ Маҳмадҷобир Ризоев иҷрокунандаи вазифаи раиси ноҳияи Кӯҳистони Мастчоҳ ва ба ҷои Мирзоаҳмад Аҳмадзода, собиқ раиси ноҳияи Мастчоҳ Ғайрат Азизов - иҷрокунандаи вазифаи раиси ноҳияи Мастчоҳ таъин карда шуданд.

Абдураҳмон Қодирӣ шахсони нав ба вазифа таъиншударо табрик гуфта, барои фаъолияти минбаъдаашон барору комёбиҳо таманно намуд.