Ба пойтатхти Тоҷикистон 15  адад тролллейбуси тамғаи «Тролза», 15 адад машинакомплекти троллейбуси тамғаи зикргардида, 50 адад автобуси тамғаи “ЛиАЗ ва 60 адад автобусҳои тамғаи «ПАЗ», ки дар худи Душанбе насбу барқарор гардидаанд, ворид карда шуданд.

Бино ба маълумоти дафтари матбуоти мақомоти шаҳрдории пойтахт, ин миқдор воситаи нақлиёти мусофирбар дар доираи қарордодҳои қаблан баимзорасида миёни шаҳрдории Душанбе бо корхонаҳои дахлдори Русия ворид гардидааст.

«Бо қарори раиси пойтахт тамоми нақлиёти мусофирбари воридшуда ба тавозуни корхонаҳои воҳиди давлатии нақлиётии шаҳри Душанбе гузаронида шуд», - гуфт манбаъ.

Зимнан зикр гардид, ки дар қарори раиси пойтахт истифодаи мақсадноки нақлиёти мусофирбари воридшуда таъкид гардидааст.