Давлатшоҳ Гулмаҳмадзода, раиси вилояти Хатлон иброз дошт, ки рӯзномаҳо бояд самти корашонро бозбинӣ кунанд.

Раиси вилоят зимни нишасти матбуотӣ ки 9-уми январ дир гардид, изҳор намуд, ки рӯзномаҳо бояд коре кунанд, ки хонандагонашон дар назди дӯконҳои фурӯши рӯзномаҳо навбат гирифта, рӯзномааашонро бихаранд ва ба умеди обунаи маҷбурӣ нашаванд.

«Имрӯз хоҳишмандони обуна ба ВАО-и чопӣ коҳиш ёфтааст, зеро мардум дигар аз воситаи ахбори электронӣ васеъ истифода мекунаду хабари лозимиашро тариқи телефонии мобилиаш мегирад ва дигар эҳтиёҷ ба хондани газет надорад. Аз ҷумла ҷавонон. Имрӯз нафарони солманд бештар газет мехонанд ва кӯшиш бояд кард, ки шумори ҷавонони газетхонро боло бурд. Дигар намешавад мардумро маҷбур кард, ки обуна шаванд. Бори дигар мегӯям, ки роҳбарони расонаҳои чопӣ бояд сари ин масъала андеша кунанд»- гуфт Гулмаҳмадзода.

Қобили зикр аст, ки ин гуфтаҳои раиси вилоят як навъ ишорае ба расонаҳои ҳукуматӣ буд, ки бештар  аз ҳисоби обунаи маҷбурӣ фаъолият менамоянд ва қариб, ки дар фурӯши озод дида намешаванд.