Дирӯз, 14-уми январи соли 2015 баъди зуҳр тақрибан соати 15:30 Хайриннисо Ҳимматзода, ҳамсар ва муниси марҳум устод Муҳаммадшариф Ҳимматзода аз марази гурда вафот карда, имрӯз соати 13:00 ҷанозаи ӯ дар масҷиди рӯбарӯи хонаи устод Саид Абдулллоҳи Нурӣ дар Душанбе баргузор мегардад.

Бино ба иттилои сомонаи расмии ҲНИТ, Хайриннисо Ҳимматзода 1-июли соли 1958 дар оилаи рӯҳонии маъруф, марҳум Эшони Тоҷиддин ба дунё омада, соҳиби 7 фарзанд аст.

Гуфта мешавад, марҳум Хайриннисо баъди издивоҷ, ҳамчун ҳамсари мушфиқ ва шарики ғамхор дар ҳама хушиҳо ва сахтиҳои зиндагӣ бо марҳум устод Ҳимматзода будааст. Дар замони Шуравӣ ӯ ба донишомузоне, ки дар хонаи устод Ҳимматзода дарси динӣ мегирифтанд, хидматҳои зиёде кардааст. Ҳамчунин, ӯ устод Ҳимматзодаро дар тӯли бемории 6-солае, ки дар натиҷаи он аз ин дунё риҳлат кард, ҳамчун ҳамсари дилсӯз ва ғамхор хидмат кардааст.