16 апрели соли 2015 бо мусоидати намояндагиҳои дипломатию консулии Тоҷикистон дар кишварҳои араб, аз ҷумла дар Шоҳигарии Арабистони Саудӣ ва Консулгарии генералии Тоҷикистон дар Дубай се шаҳрванди Тоҷикистон бо автобуси мусофиркашонӣ аз Яман ба Арабистони Саудӣ ворид шуд.

Бино ба иттилои Вазорати корҳои хориҷии ҶТ, 17 апрел онҳо аз Ҷидда ба самти Дубай ва аз он ҷо ба Душанбе парвоз кардаанд ва ҳоло намояндагиҳои дипломатии Тоҷикистон ҷиҳати баровардани ҳудуди 6 нафар шаҳрвандони Тоҷикистон, ки дар Яман фаъолият доранд, чораҳои зарурӣ меандешанд.

Қайд мешавад, ки тибқи дастури Президенти Ҷумҳурии Тоҷикистон намояндагиҳои дипломатию консулии Тоҷикистон дар кишварҳои араб баҳри берун овардани шаҳрвандони боқимондаи Тоҷикистон аз Ҷумҳурии Яман тамоми чораҳои заруриро меандешанд.