Ба фаъолияти тамоми фурӯшгоҳҳову дӯконҳои бозори «Саховат»-и пойтахт, ки чанде қабл баста шуда буданд, дубора иҷозат дода шуд.

Соҳибкорони бозор ба «Азия-Плюс» дар ин робита иттилоъ доданд, ки мушкилоти баста будани як қисмате аз бозор баъди нашри муроҷиати савдогарони ин фурӯшгоҳҳову дӯконҳо дар торнамои хабаргузорӣ саривақт мусбат ҳаллу фасл шуд.

Савдогарони фурӯшгоҳҳои пеши бозори «Саховат», ки баста шуда буданд, дар муроҷиат ба «Азия-Плюс» изҳор карда буданд, ки ба онҳо имкони кор дода намешавад. Аксарият аз он шикоят доштанд ки барои тиҷорат қарз гирифтаанд ва маҳсулоти барои савдо харидаашон тез вайрон мешавад.

Бозори «Саховат», воқеъ дар қисмати ҷанубии пойтахт яке аз бозорҳои бузурги маводи ғизойии шаҳри Душанбе маҳсуб меёбад. Дар ин бозор деҳқонони навоҳии тобеи марказ ва вилояти Хатлон маҳсулоти худро ба фурӯш мегузоранд. Моҳи ноябри соли 2010 дар ин бозор сӯхтор сар зада, бар асари он 19 фурӯшгоҳ комилан ба коми оташ рафта буд.