Китоби донишманди тоҷик Сайфуллоҳи Муллоҷон ва муҳаққиқи эронӣ Беҳрӯзи Тоҳирниё таҳти унвони «Хуросону Мовароуннаҳр аз нигоҳи ҷаҳонгардон (бо такя бар сафарномаҳои аврупоӣ)» дар интишороти «Дафтари хадамоти чопии аз-Заҳро»-и шаҳри Машҳад ба нашр расид.

Дар ин китоб авзои сиёсӣ, иқтисодӣ ва фарҳангии шаҳрҳои Хуросону Мовароуннаҳр аз нигоҳи ҷаҳонгардони аврупоӣ мунъакис гардидааст.

Дар сарсухани китоб оварда шудааст, ки: “Дар ин китоб саъй гардидааст, ки танҳо аз кутуби сафарнома истифодаи инҳисорӣ нагардад, балки ба сурати татбиқӣ авзоъ ва аҳволи сиёсӣ ва иқтисодиву иҷтимоии Хуросону Мовароуннаҳр дар қарнҳои XVI-XVIII дар осори таърихӣ ва манобеъу маохизи муҳим низ мавриди баррасӣ қарор гардад ва ҳар ҷо сайёҳон дучори ғаразҳои шахсӣ ва ибҳому заъфи маълумот гардидаанд, бо баррасии кутуби таърихии муҳим аз иштибоҳу хато бикоҳем”.

Китоб бо теъдоди ду ҳазор нусха нашр гашта, барои истифодаи устодон, донишҷӯён, мутахассисони таъриху фарҳанг ва умуми дӯстдорони таърих пешниҳод мегардад.