Вазорати тандурустии Тоҷикистон дар робита бо яку якбора баланд шудани ҳарорати ҳаво дар ҷумҳурӣ бо интишори як зумра тавсияҳо аз мардум хостааст, онҳоро тӯли тамоми давраи гармо риоя намоянд.

Аз ҷумла, Вазорати тандурустӣ тавсия медиҳад , ки меъёри бехатари ҳарорат дар манзили истиқоматӣ нигоҳ дошта шавад. Ин меъёр набояд аз 32 дараҷа рӯзона ва 24 дараҷа шабона зиёд бошад.

Хуҷраҳои манзили истиқоматӣ муддати шаб ва субҳи барвақт шамол дода шавад. Гуфта мешавад, дар вақти гармӣ дар қисмати салқини хона хуфтану истодан тавсия дода мешавад.

Кӯча баромадан аснои гармии тоқатфарсо тавсия дода намешавад. Хамчунин зикр мегардад, ки кӯдаконро дар дохили автомобилҳои дар таваққуфгоҳ гузошташуда нагузоред. Бо оби сард оббозӣ кардан ҳам аз зумраи тавсияҳои вазорати тандурустӣ мебошад.

Ёдрас мекунем, ки қаблан муассисаи обуҳавошиносии Тоҷикистон огоҳ карда буд , ки аз 1 июл ҳарорати ҳаво дар ҷумҳурӣ 7-12 дараҷа боло рафта, аз 1 то 5 июл дар кишвар обуҳавои софу хушк ва беҳад гарм дар назар аст.