Мақомоти ҳифзи ҳуқуқи шаҳри Қӯрғонтеппа қарор карданд, ки барои адои намози таровеҳ дар масҷид ба ҷавонони синни то 18-сола монеъа эҷод намекунанд.

Сардори Шуъбаи ВКД Тоҷикистон дар шаҳри Қӯрғонтеппа Абдураҳим Мирзоев зимни суханронӣ дар масҷиди шаҳрии «Муҳаммад» қабл аз намози ҷумъа изҳор дошт, ки мақомоти интизомӣ тасмим гирифтаанд, ки дар моҳи мубораки Рамазон дар масҷидҳо рейд намегузаронанд.

«Мақомоти ҳифзи ҳуқуқ ба чунин хулоса расиданд, ки барои адои намози таровеҳ ба ҷавонони сини то 18-сола дар ин моҳи шариф монеъ намешаванд. Мо медонем, ки шумори онҳо зиёд аст, вале дар ин моҳи муқаддас инро ба назар намегирем, вале аз имомхатибон хоҳиш дорем, ки бо анҷоми моҳи Рамазон ҷавонони синни то 18-соларо ба масҷид роҳ надиҳанд», - гуфт ӯ.