Дар Тоҷикистон баҳсҳо сари кадом рӯз ҷашн гирифтани Иди саиди Фитр идома доранд. Ҳарчанд Шӯрои уламо аллакай ҳисобу китоб кард, ки имсол моҳи Рамазон аз 29 рӯз иборат асту дар Тоҷикистон низ чун дар саросари ҷаҳони ислом Иди Фитр санаи 17 июл ҷашн гирифта мешавад, бархе аз сокинони кишвар то ҳол андеша доранд, ки Иди Рамазон рӯзи 18 июл фаро мерасад.

Рӯҳонии маъруфи тоҷик Домулло Ҳикматулло Тоҷикободӣ дар мусоҳиба ба «Азия-Плюс» дар ин робита изҳор намуд, ки мувофиқи ҳадисҳои пайғамбар Муҳаммад (с), моҳҳои мусалмонии Рамазон ва Зул-ҳиҷҷа (дар моҳи Зул-ҳиҷҷа Иди Қурбон ҷашн гирифта мешавад) аз 30 рӯз иборатанд ва агар ба ин гуфтаҳо амал намоем, анҷоми моҳи Рамазон ва ид ба санаи 18 июл рост меояд.

Ба саволи кадом рӯз ҷашн гирифтани Иди Фитр аз ҷониби худи домулло, ӯ посух нагуфта, танҳо илова намуд, ки «мо аз марказ дурем».

Ёдрас мекунем, ки бо қарори Шӯрои уламои Маркази исломии Тоҷикистон , имсол дар Тоҷикистон Иди саиди Фитр санаи 17 июл ҷашн гирифта мешавад. Раиси Шӯрои уламо Саидмукаррам Абдулқодирзода дар ин робита иттилоъ дод, ки рӯзи 13 июл аъзои Шӯрои уламои иборат аз 25 нафар дар хусуси имсол рӯзи 17 июл ҷашн гирифтани Иди Рамазон қарор қабул карданд.