Муддати 15 рӯз намояндагии Хадамоти муҳоҷирати Вазорати меҳнат, муҳоҷират ва шуғли аҳолии Тоҷикистон дар Русия ба дастрас шудани музди меҳнати муҳоҷирони кории тоҷик дар ҳаҷми 1 млн. 331 ҳазор рубл мусоидат намуд.

Сухангӯи намояндагӣ Иброҳим Аҳмадов ба «Азия-Плюс» дар ин робита иттилоъ дод, ки бо мусоидати намояндагӣ ва суҳбату мулоқот бо раҳбарияти корхонаи истеҳсолу маҳсулоти ширу гӯшту вилояти Маскав, ки дар он беш аз 20 нафар шаҳрвандони Тоҷикистон машғули кор будаанд, ба муҳоҷирон ба маблағи умумии 1 млн. 174 ҳазор рубл қарздорӣ аз музди меҳнат пардохта шудааст.

Ба гуфтаи ӯ, ҳамчунин намояндагӣ ба пардохти маблағи қарздорӣ аз маоши муҳоҷирон Одинабек Лоиқов ва Муҳаммадҷон Қурбонов дар ҳаҷми 124 ҳазор ва 33 ҳазор рубл, ки дар ҶДММ «Римтек»-и шаҳри Екатеринбург кор мекунанд, низ кумак кард.

«Зимни баррасии чунин муроҷиатҳо раҳбарияти корхонаҳо асосан ба пардохт нашудани музди меҳнати муҳоҷирон ё саривақт пардохт нашудани он мушкилии молиявии корхонаро сабаб меоранд», - гуфт Аҳмадов ва илова намуд, ки намояндагӣ минбаъд низ ба баррасиву ҳалли ба ин монанд муроҷиатҳои ҳамватанон идома медиҳад.