Дар рейтинги нави кишварҳо аз рӯи шароити беҳтари зиндагӣ барои шахсони пиронсол Тоҷикистон мақоми 58-умро касб кард.

Созмони ғайридавлатии HelpAge International (HAI) бо дастгирии СММ як таҳқиқоте анҷом дода, тибқи натиҷаҳои он таҳти унвони Global AgeWatch Index 2015 рейтинги кишварҳо аз рӯи сифати зиндагӣ барои шахсони синни аз 60-соларо таҳия намуд. Рейтинг 96 кишвари саросари дунё ва таҳқиқот 90% аз шумори одамони пиронсоли ҷаҳонро фаро мегирад.

Имсол бо касби мақоми 58-ум Тоҷикистон нисбат ба рейтинги  соли гузаштаи HelpAge International мавқеъи худро се зина беҳтар кард.

Кишварҳои дорои шароити беҳтарини зиндагӣ барои шахсони пиронсол Швейтсария, Норвегия, Шветсия, Олмон ва Канада эътироф шудаанд. Ба даҳгонаи беҳтарин ҳамчунин Нидерланд, Исландия, Ҷопон, ИМА ва Британияи Кабир низ шомил гардидаанд.

Дар рейтинги мазкур Қирғизистон мақоми 51-ум, Русия - 65, Украина - 73, Гурҷистон - 29, Арманистон - 43, Литва - 63, Беларус - 64 ва Молдова зинаи 77-умро ишғол намудаанд. Натиҷаи беҳтаринро миёни кишварҳои собиқи шӯравӣ Эстония соҳиб шудааст, ки дар зинаи 23-юм қарор дорад. Мақоми охирини 96-умро Афғонистон ишғол мекунад.

Мутахассисони HelpAge International маълумоти омории Бонки ҷаҳонӣ, Созмони умумиҷаҳонии тандурустӣ, Созмони байнулмилалии меҳнат ва UNESCO-ро мавриди омӯзишу таҳлил қарор додаанд.

Зимни таҳияи рейтинг 13 нишондиҳанда, аз ҷумла миқдори муроҷиатҳо ба муассисаҳои тиббӣ, шароитҳои зиндагӣ, маориф, шумори коркунандагон ва фаъолнокии иҷтимоӣ мавриди таваҷҷуҳ қарор гирифтаанд.