Вазорати маориф ва илми Тоҷикистон мусоидат ба дарёфти омӯзгореро дархост мекунад, ки толибилмро мавриди лату кӯб қарор додааст.

Аз Вазорати маориф ва илми ҶТ ба «Азия-Плюс» дар ин робита иттилоъ доданд, ки вазорат ин ҳодисаро таҳқиқ дорад, вале он алҳол бенатиҷа буда, омӯзгори нисбати хонанда ба зӯроварӣ роҳдода то ҳанӯз дарёфт нашудааст.

«Омӯзгор аз доираи Кодекси ахлоқи омӯзгор баромада, барои ин бояд ҷазои дахлдор гирад. Мутаассифона, боиси тааҷҷуб аст, ки ҳеҷ кадоме аз ҳамкорон ё директори мактабе, ки ин омӯзгороо медонад, то ҳол ҳеҷ вокунише нишон намедиҳанд. Ҳамчунин аз волидони ин хонанда низ ҳеҷ хабаре нарасидааст, ҳарчанд маълум аст, ки омӯзгор ба қонуншиканӣ роҳ додааст», - гуфт ҳамсуҳбат аз Вазорат.

Ба гуфтаи манбаъ, агар аз ҷониби муасисаи таълимӣ ба муайян кардани ин омӯзгор мусоидат нашавад, пас директори ин мактаб низ барои саривақт огоҳ накардан дар бораи ин ҳодиса ва пешгирии он муҷозот мешавад.

Зимнан зикр гардид, ки омӯзгоре, ки хонандаро мавриди лату кӯб қарор додааст, метавонад аз кор озод карда шавад.

Ёдрас мекунем, ки рӯзи шанбеи ҳафтаи гузашта дар шабакаҳои иҷтимоӣ наворе нашр шуд , ки дар он барои аз дарс дер мондан омӯзгор толибилмро лату кӯб мекунад.