Вазорати маориф ва илми Тоҷикистон дар мувофиқа бо ҳукумати ҷумҳурӣ дар бораи тағйири вақти оғози дарсҳо дар муаассисаҳои таҳсилоти олӣ ва миёнаи касбии шаҳри Душанбе қарор қабул кард.

Аз Вазорати маориф ва илми Тоҷикистон ба «Азия-Плюс» дар ин робита иттилоъ доданд, ки шурӯъ аз 16 ноябр, рӯзи душанбеи ҳафтаи оянда дар ҳамаи макотиби олӣ, коллеҷ ва омӯзишгоҳҳои пойтахт дарсҳо ним соат пештар, яъне соати 7-у 30 дақиқаи субҳ оғоз меёбанд.

Ба иттилои манбаъ, ин қарор бо дархости мақомоти шаҳрдориии Душанбе дар бораи бозбинии вақти ҷадвали дарсҳои донишҷӯёни мактабҳои олии пойтахт ва ҳамчунин бо мақсади кам шудани тамбаҳо (пробкаҳо)-и автомобилӣ субҳу шом дар роҳҳои мошингарди шаҳр қабул шудааст.

Дар робита ба муҳлати амали реҷаи нави оғози дарсҳо дар макотиби олӣ, коллеҷу омӯзишгоҳҳои пойтахт зикр гардид, ки «шаҳрдорӣ сохтмони метро ё дигар роҳҳои алтернативиро дар нақша дорад». Танҳо пас аз бунёди зербинои нави шаҳр, донишҷӯён метавонанд ним соат вақти хоби талафёфтаи худро дубора бозпас гиранд.

Ёдрас мекунем, ки дар машварати кории рӯзи 5 октябри соли равон зимни баррасии масъалаи марбут ба тамбаҳои зиёди мошинҳо ҳар субҳу шом дар роҳҳои пойтахт, раиси шаҳри Душанбе Маҳмадсаид Убайдуллоев ба хадамоти дахлдори шаҳрдорӣ дастур дод, ки ҳамроҳ бо Вазорати маориф ва илм масъалаи бозбинии реҷаи вақти таҳсили донишҷӯёни макотиби олии пойтахтро мавриди омӯзиш қарор диҳанд.

Ба андешаи раиси шаҳри Душанбе, тағйири вақти реҷаи таҳсил дар муассисаҳои таълимии пойтахт ба қисман ҳал кардани ин мушкилот мусоидат мекунад.