Ташкилотҳои ғайриҳукуматиии олмонии Tajik Aid ва Pamir-Half ба дастгирии аҳолии осебдида аз заминларза дар водии Бартанги Вилояти Мухтори Кӯҳистони Бадахшон идома медиҳанд.

Дар иттилоияи интишоршудаи сафорати Олмон дар Тоҷикистон дар ин робита қайд мешавад, ки бо пешниҳоди ташкилои шарики худ дар Помир ва намояндагии дипломатии Олмон дар Душанбе, ташкилотҳои Tajik Aid ва Pamir-Half тасмим гирифтаанд, ки ба сокинони аз офати табиӣ осебдидаи водии Бартанг кумак кунанд.

Гуфта мешавад, кумаки башардӯстонаи иборат аз сарулибоси зимистона, маводи ғизойӣ барои кӯдакон ва воситаҳои шустушӯву гигиена, ки ба шаҳри Душанбе расидаанд, аллакай ба водии Бартанг фиристода шуда, аз ҷониби ташкилоти шарики Tajik Aid миёни зарардидагон ва ниёзмандон тақсим карда мешаванд.