Зимни мулоқоти вазири маориф ва илми Тоҷикистон Нуриддин Саид бо сафири Ҳиндустон дар Тоҷикистон Бираҷа Прасад ҷараёни амалисозии тавофуқҳои ҳосилшуда миёни кишварҳо дар соҳаи илму маориф мавриди баррасӣ қарор гирифтанд.

Бино ба иттилои хадамоти матбуоти Вазорат, Нурддин Саид қайд кардааст, ки дар асоси Барномаи омӯзишии ҳамкориҳои техникиву иқтисодии Ҳиндустон оид ба мубодила дар соҳаи маориф (ITEC), ҳамасола ҷиҳати омӯзиши забони англисӣ ва дигар ихтисосҳои техникиву иқтисодӣ барои даҳҳо муҳаққиқон, аспирантҳо, коромӯзон ва омӯзгорони тоҷик бурсияи таҳсилӣ ҷудо гардида, онҳо дар Ҳиндустон таҷриба меандӯзанд.

Вазири маориф ва илм қайд кард, ки айни ҳол дар муассисаҳои таҳсилоти олии касбии Тоҷикистон зиёда аз 140 нафар шаҳрванди Ҳиндустон таҳсил мекунанд.

Зимнан зикр гардид, ки барои қонеъ сохтани талаботи муассисаҳои таълимии типи нави кишвар ба омӯзгорони забони англисӣ ва фанҳои дақиқ, шумори муайяни омӯзгорони Ҳиндустонро Тоҷикистон барои кор ба ҷумҳурӣ даъват мекунад.