Зимни суханронӣ дар иҷлосияи чоруми Маҷлиси вакилони халқи шаҳри Душанбе рӯзи 24 декабр раиси пойтахт Маҳмадсаид Убайдуллоев хотиррасон намуд, ки тибқи пешгӯиҳо, дар робита ба буҳрони иқтисодӣ дар кишварҳои хориҷӣ, бозгашти оммавии муҳоҷирони кории тоҷик аз ин давлатҳо дар назар аст.

Тавре аз мақомоти шаҳрдории Душанбе ба «Азия-Плюс» дар ин робита иттилоъ доданд, раиси пойтахт ба Раёсати Агентии меҳнат, муҳоҷират ва шуғли аҳолии шаҳр дастур додааст, ки дар ҳамдастӣ бо сохторҳои дахлдори дигар оид ба таъсиси ҳарчӣ бештар ҷойҳои нави корӣ тадбирҳои таъҷиливу муассир андешанд.

Маҳмадсаид Убайдуллоев ҳамчунин супориш додааст, ки мутобиқи талаботи бозори кор фаъолияти биржаҳои меҳнат бозбинӣ ва аз нав ташкил карда шавад.

Зикр гардид, ки тӯли 11 моҳи соли ҷорӣ аз ҳисоби буҷети шаҳр ба 704 нафар бекорони расмӣ ба сифати кумак 466 ҳазор сомонӣ маблағ пардохт шудааст.